Gabbro

Klass	gabbroid
	Restrennow kelmys war Gemmyn Wikimedia

Gabbro ew hanow bagas meur a garrygi tanek tewl gen gwrisow meur. Ma dhe anjei an keth komposyans ha basalt. An karrygi ew plutonek, hebm ew, furvyes pan vo magma teudh maglednys en-dadn enep an nor, ha yeynhe rag bos karrek wrisek. Usys veu an term gabbro rag an pres kensa en 1760 rag deskrifa karrygi dhort menedhyow Itali. Henwys veu dhort treveglos 'Gabbro' en Toskana. Karrek gen dosedh uhel ew, ha gwyrdh po tewl hy liw. Hy a gomprehend meur a byroksen ha gwrisven sodiom ha nebes amfibol hag olivin.

Ma dhe'n brassa radn a enep an nor gabbro e'n gresten geynvoryek. Askorrys ew gen magmatedh basalt en keynow kres an mor bras. Dre vras, pan vo gabbro furvyes, ev a worwedh a-ugh mantel an Norvys, hag en-dadn an basalt a furvyas en skaffa. Kevys ew gabbro ewedh dhort plutonow kelmys dhe venedhyow tan brastiryel.

Ma dhe'n garrek gabbro gwrisow meur (an gwryiow ew 1mm en treuslinen po moy), ow tiskwedhes hei dhe furvya en lent.

Kebmyn ew en Menydhyow an Cuiltheann en Sgotlond.